O le mae’a ona uia o ala faaletulafono i le toe talosaga o tamalii e toatolu na faamuta talu ai nei o latou tofi faamasino o le faamasinoga o fanua ma suafa, ua faaalia ai e se molimau faatuatuaina, ua toe filifilia i latou e tauave tofi faamasino o lea faamasinoga tāua a le atunuu, o loo lipoi ai mataupu i suafa matai ma fanua faaleaganuu.

Ua faailoa mai e le molimau ua tālia nei le faamaoniga a le Kapeneta i le faaiuga ua taunuu iai le komisi o galuega a le faamasinoga o fanua ma suafa ua toe filifilia ai le afioga Tuioti Folasa Sakaria Taituave, le tofa Tuilagi Saipele Esera, ma le afioga Iuli Auga Sefo Fautuaalii.

O le faamutaina o tofi faamasino o i latou nei sa mafua ona o aiaiga o le Tulafono fou o Faamasinoga o Fanua ma Suafa o le tausaga e 2020 na amata faamamalu i le masina o Mati o le tausaga e 2021, lea e lei iai se aiaiga e tofia ai i latou ae ua mae’a nei ona toe teuteu ni vaega o lea Tulafono, ma ua aloaia ai nei faaletulafono lo latou filifilia ina ua mae’a uia ala faaletulafono e pei o le toe talosaga mo tofiga faamasino o le faamasinoga o fanua ma suafa.

O le Aso Faraile na tea nei e pei ona faailoa e le molimau faatuatuaina na tofia ai i latou e le komisi o galuega a le faamasinoga o fanua ma suafa e taitaifono ai le afioga i le Peresetene o lea faamasinoga.