O se taimi tāua lenei i le tu lata atu i aso fiafia o le faaiuga o le tausaga i le taimi o le Kirisimasi aemaise le tausaga fou, o le a malaga mai ai ma aiga ma uo mai atunuu i fafo i le faatoa toe tatala o nei malaga masani i le tuanai o noataga o le faamai Koviti-19.
Peitai ua feagai le pulega o se tasi o faletalimalo tu matafaga le Satuiatua Beach Resort i Savaii, ma galuega o le toe fausia o se tasi o nofoaga autu o lana auaunaga ona ua faatamaia i le malaia poo le afi.
O le vaega o le faletalimalo e iai le faleaiga ma le ofisa na aafia i le malaia i le taeao o le Aso Sa na tea nei i le taimi o lotu o le taeao.
Ua faailoa e le pulega o se ogaumu sa ola ua galo ona titina, na mafua ai le mu, peitai e le o aafia isi fale Samoa ma potu e faamautu ai malo, o loo lelei ma saogalemu.
E le o iloa le tau aofai o le maota ua faaleagaina ma meatotino ua aafia ai, ae pau le itu ua faailoa e le pulega o le Satuiatua Beach Resort o loo faaauau pea le latou tautua i malo e asiasi atu.
O se tasi lea o pisinisi tau tagata tafafao i Savaii o loo mafai ona faamautu ai o tatou tagata i ni malaga pupuu mo faalavelave o aiga ma tafaoga.
