Ua tuanai le lua tausaga sa tu ai i le faaletonu avanoa faigaluega i luga o vaa tetele o le sami, e pei o vaa oloa ma meli la’upasese ona o le aasa o le pipisi o le faamai koviti.

Ae o le mavae atu o ia taimi faigata sa toe taliu mai ai i le atunuu le toatele o alii vaa poo seila sa galulue i atunuu Europa, o lea ua aumai i se tulaga faalauaitele se finagalo o le pulega o le kamupani vaa a Samoa ua faailoa mai ai le toe maua o ia avanoa faigaluega i luga o vaa tetele o le sami.

Faaalia e le Ofisa Sili o le pulega o le kamupani vaa a le atunuu le susuga Lautimuia Afoa Uelese Vaai, e le tau faailoaina tulaga maaleale sa iai le lalolagi ona o puipuiga o le ola ma le soifua o tagata mai le faamai e pei foi o alo ma fanau a le atunuu sa galulue i luga o vaa tetele, peitai o loo tumau pea le sini o le silasila taulai a le kamupani vaa ia maua pea ia avanoa faigaluega mo seila ua mae’a aoaoina.

O le taimi nei e tusa ma le 300 seila mai Samoa ua toe galulue nei i luga o vaa ma e toatele lava o meli la’upasese. O loo sauni le isi toa 73 e malaga e galulue i luga o meli la’upasese, ma le isi toa iva e galulue i luga o vaa lau oloa.

Faaalia e le Ofisa Sili o pulega o le kamupani vaa a le atunuu, o atunuu Asia o se maketi tele o loo maua ai seila mo galuega nei, peitai o loo i totonu pea Samoa i le tauvaga ma ia atunuu i le maua o ia avanoa faigaluega.

Ma ua faafetaia ai e le pulega o le kamupani vaa o le Mediterranean Shipping Company poo le MSC i Europa o loo fai paaga ma le kamupani vaa a Samoa o loo maua ai avanoa faigaluega o alii ma tamaitai seila mai Samoa.