Ua toe faaleaogaina fuafuaga o le solo tetee a Iuni a faiaoga i le asō ina ua mae’a se fonotaga ma le minisita o aoga, Jan Tinetti.
Fai mai lipoti sa valaau e le minisita se fonotaga i le va o le Post Primary Teacher Association le PPTA, le Educational Institute ma le matagaluega o Aoga i le Aso Faraile talu ai ma faailoa ane ai i le aufaasalalau e vaega ia e pei o le PPTA ma le NZEI ua le oo a latou solo tetee sa fuafua mo le vaiaso nei seia mae’a le Aso Lua o le vaiaso fou 30 o Me, a o galulue ai le matagaluega o aoga i nisi ofo fou tau totogi.
O le maliega e pei ona lipotia i le One News e aofia ai le vaega o le primary ma le secondary ma area school e pei ona faaigoaina ai i le faa-Peretania.
O le aso a taeao sa fuafua e le faatinoina ai galuega a sui o le PPTA i le aoaoina o tamaiti i le tausaga 13 ma le Aso Tofi i le tausaga 11, sa fuafua foi puleaoga o aoga ia e taofia lo latou faatinoina o galuega a le matagaluega.
I se feau tusitusia sa tuuina ane i sui o le NZEI na maua iai se kopi a le RNZ ma lipotia i le televise tasi ua faailoa ai e le peresetene o Mark Potter sa tulaga lelei le fonotaga i le Aso Faraile talu ai ma ua tau fai finagalo pati o loo aofia ina ia galulue agai i se tali o le mataupu.
Ae fai mai a ia e ono toe solotetee foi sui o le Iuni i le aso 31 o Me pe afai e palota uma e tetee.
Ua faailoa foi i le lipoti ua ofo ane e le matagaluega o aoga ni maliega tali tutusa i faiaoga o aoga ia ma aoga faataitai, e faatolu ona sii totogi mo le tolu tausaga mae 11-13.9 pasene le siitaga o le a iai.
Ua taliaina e faiaoga o aoga faataitai le ofo lea ae le taliaina e aoga lea la o loo toe faatalia nei se tulaga lata mai ua iai le mataupu.
