O le Aso Lulu na tea nei na faatoa vaaia ai foliga o le oloa tau taumafa o le aniani i supamaketi ma faleoloa laiti i le taulaga ma nuu i tua i Upolu ma Savaii, i le lata i le fa vaiaso e le o toe maua ona o le tuai o uta aniani mai Niu Sila.
Peitai o lea foi ua molimauina le lē toe vaaia o lea oloa tau taumafa ona o le vave alumia. O se tasi o faleoloa supamaketi i le taulaga na maua ai aniani i le faaiuga o le vaiaso na tea nei, sa iai ma le faasilasilaga i le fata faatau e na o le tasi lava le afifi aniani a le tagata e mafai ona faatau.
O nisi o aiga sa maua a latou aniani mo le faamanogiina o taumafa a o lei taunuu le uta i le ogatotonu o le vaiaso mulimuli o Tesema, mai a latou faamomoli na sau ma le Lady Samoa IV i Amerika Samoa.
O aniani o loo faatau i Samoa e sau tasi uma uta mai Niu Sila, peitai ua faailoa ise lipoti ua mafua ona tuai mai uta o lea oloa ona o le toagaogao o tagata faigaluega i faatoaga aniani i Niu Sila, lea o loo maua ai foi e nisi o atunuu o le Pasefika e pei o Tonga, Fiti, ma le Atu Kuki lea oloa tau taumafa.
O le faaitiitia o le aniani ua atili taulia ai isi fua tau faatoaga o loo faamanogi ai meaai e pei o fiu, aniani ua ta’ua o spring onions, pepa, ma le ano.
