Ua manao le pati a le ACT e toe sui ma faafoi le tulafono i le mea sa iai muamua e faamasinoina ai talavou ta’i 17 tausaga i lalo o le faiga o loo faamasinoina ai tagata matutua.
O talavou 17 tausaga o lea e le o faamasinoina e le faamasinoga maualuga poo faamasinoga faaitumalo ae o loo auina atu i suesuega tau i le tulafono ua faapitoa mo tupulaga talavou, ma e faapea foi le faiga e le o faafalepuipui faatasi ai ma tagata matutua.
Peitai ua ta’ua e le taitai o le ACT, David Seymour ananafi, o lea na lagolagoina e le latou pati i le 2016 le suiga ua iai nei ma le faamoemoega e faaitiitia ai soligatulafono o loo faia e talavou.
Ae talu mai ona aloaia i le 2019, fai mai Seymour e lei ausia ai faamoemoega ma o lea ua tatau ona toe faafoi i le mea sa iai.
Saunoa Seymour, ua tatau i talavou ua 17 tausaga le matutua, ona iloa le taunuuga e oo iai pe a soli le tulafono.
