E silia laititi ma le 48 itula talu ona toe taunuu mai i laufanua o Ausetalia taitoalua ma fanau a i latou sa tau mo le kulupu a le ISIS poo le setete Isalama ma ua faamautu nei i Punchbowl i Sini ma vaaia foi i le faleaiga a le McDonalds i le aso ananafi a o agiga pea faitioga a le toatele o tagata e aumau i le faaitu lea sa faaleo mai lava i le masina talu ai ona o le lē mananao ina ia faamautu atu i latou ia i o latou faaitu.
O le faaiuga o le vaiaso na toe tulaueleele mai ai i latou ia ma o latou aiga, na laveaiina mai e le malo o Ausetalia mai se camp a le au sulufai i totonu o Suria i Matu lea na nonofo ai mo le tolu tausaga talu ona faatoilaloina taumafaiga a le iSIS.
O le finau a komiuniti ia ua nonofo ai i latou ia e faapea e le tatau ona toe taliaina i le atunuu tagata nei ona o gaioiga lē migao ma lē talafeagai sa faatino e le ISIS.
Peitai ua lipotia i lenei vaiaso se finagalo faaalia o le malo o loo silasila i fautuaga aupito faamoemoeina ua tuuina e i latou o faufautua sinia a le atunuu i mataupu faapea.
