Ua tele tausaga o faipaaga le Matagaluega a le Soifua Maloloina ma se tasi o faalapotopotoga mai Niu Sila ua ta’ua o le Fred Hollows Foundation lea na toe faia se sainigalima e faaauau ai le galulue faatasi i vaega mo le faaleleia o auaunaga i le siakiina o le vaai.
O le sainia ai o le toe faaauauina o lenei faigapaaga ua sainia lea mo le isi lima tausaga ma le sini autu ina ia foia ai ma faaitiitia ai le aafia o le vaai.
O lenei faigapaaga o loo amanaia ai le tulaga o le galulue vaavaalua ia siitia le tulaga o le soifua manuia e ala i le lelei o le vaai e ogatasi lea ma atina’e o loo faatulagaina e Malo Aufaatasi i le itu tau i le soifua maloloina.
O lenei faamanuiaga o loo aofia ai le aoaoga mo tausi soifua e 17 faapea ai ma le fomai mata, o nisi o galuega ma aoaoga faaauau mo le atinaega o lenei itu o le auauanga faalesoifua maloloina o meatotino ma masini e faaaogaina i le auaunaga ma isi.
I le sefulu tausaga ua mavae, o le galulue faatasi o le Matagaluega ma le faalapotopotoga lenei mai Niu Sila sa tuuina lea o le fesoasoani e lagolago ai se tasi o kulupu a le Pasefika i Fiti na mafai ona malaga mai i le atunuu e faatino ni asiasiga i auaunaga o le siakiina o le vaai.
I se pepa o faamatalaga na tuuina mai o loo auina mai ai le saunoaga a le Faatonu Sili a le Matagaluega, Aiono Dr Alec Ekeroma i le agaga faafetai i lenei faigapaaga mo le fesoasoani i le tele o tausaga mo Samoa ma ona tagata.
“Ua tele tausaga o galulue soosootau’au ai vaega nei e lua ma e ta’utino atu o lenei faigapaaga ua tele itu ua fesoasoani ai i le faaleleia o le auaunaga a le Matagaluega i le vaega o siaki ai le vaai ma e iai le talitonuga o le a faaauau ai pea lenei vaega auā le mautinoa lea o le soifua maloloina lelei o soo se tagata e moomia le fesoasoani.”
O vaega o le maliega na toe sainia e ao ina ausia e aofia ai le lelei ona taitaiina le tulaga o le auauanga i le siakiina o le vaai, ia mautinoa le mataalia o le auaunaga i lea vaega ma ia ausia uma vaega ma fuafuaga faatulagaina mo lenei foi auaunaga.
O lenei faigapaaga o loo agai lea i le vaaiga taulai a le matagaluega e ala i ana fuafuaga ua mae’a fausia faapea ma taiala e lima taitaiina ai le auauanga faalesoifua maloloina i le atunuu.
