I le siitia ai pea o le sao o tina ma tamaitai o le atunuu ma faatāua o latou agavaa ma tomai a’oa’oina i soo se auaunaga ma tautua i totonu o le Malo, o le vaiaso nei i le fono a le Kapeneta, na faamautu ai le toe faaauau i le tulaga faaleoleo o le sui Komesina o se tasi o tina le susuga Papalii Monalisa Tia’i Keti.

O ia le uluai tamaitai i le tautua a Malu o le Malo na mua i malae i lea tulaga faaleoleo i le taimi o avea le afioga Fuiavailili Egon Keil ma Komesina o le matagaluega. 

I le pepa o faasalalauga mai le ofisa sooupu o le Malo ua faailoa ai o Papalii ua 20 tausaga o lana tautua i le Matagaluega o leoleo, falepuipui ma le toe fuataina, ma o loo ia umia le tusipasi i le polokalame faataitai i totonu o pulega faaleoleo a le malo o Ausetalia e ta’ua o le certificate of completion in executive leadership.

O loo ia umia foi le certificate IV i training and assessment mai le aoga o matata eseese i Canberra i Ausetalia, o le tusipasi o le Certificate IV in Frontline Management mai le Kolisi a le fitafita maligi a Ausetalia, o le faailoga o le Bachelor of Social Sciences mai le Iunivesite a Waikato i Niu Sila, o le Bachelor of Law & Professional Diploma in Legal Practice mai le Iunivesite a le Pasefika i Saute faatasi ai ma le faailoga o le Masters in Transnational Crime Unit mai le Iunivesite a Wollongong i Ausetalia.