Ua toe taliu le usugafono a le Kovana Sili o Amerika Samoa ma lana aumalaga e 87, ina ua mautu fausaga o nisi o mataupu sa faatalanoa i le fono lona lua o lenei tausaga o le Atoa o Samoa.
Ua le gata nei ina toe tatala le faaulufale i le teritori o aano o manufasi e pei o fasipovi, ma taumafa e pei o fuamoa, ae o lea foi ua toe tatala le faaaoga o le pemita 14 aso.
Ua fai si umi o taofia lea pemita ae faaaoga na o le pemita 30 aso. O lea foi ua mautu mai e tatau ona oo atu i le aso muamua o le masina faaiu o lenei tausaga, le masina lea o Tesema ua taofia le aiaiga tau femalagaa’iga a Amerika Samoa ua ta’ua o le Talofa Pass.
O le Aso Faraile na tea nei na faamae’a ai le fono o le Atoa o Samoa i se sainiga lima a le Kovana Sili le afioga Lemanu Peleti Palepoi Sialega Mauga ma le tamaitai Palemia o Samoa afioga Fiame Naomi Mataafa i mataupu sa talanoaina ma faia iai faaiuga.
O le aotelega o ia mataupu e ala i le MOU poo le Memorandum of Understanding, ua mae’a sainia e lei oo mai i tusitala ma le aufaasalalau. Ae o le taualuga o le fonotaga na alo ai le Kovana sili ma lana usugafono aemaise o le faigamalo a Tutuila ma Manu’a i ana faaaloaloga mo le Palemia ma le Malo o Samoa.
E sefulu afe Amerika le faaaloalo mo le Palemia, fitu afe mo le sui Palemia ae sa faasopolia uma foi Minisita o le kapeneta i teutusi tai 3 afe tala meleke.
O faaaloaloga i taumafa e selau pusa tuafale o manu o le pipi, selau pusa apa tuna, selau pusa o pipi atoatoa, ma le selau pusa moa.
Ae mo le usugafono mai Amerika Samoa na toe faaopoopo foi i faaaloaloga a le Malo o Samoa na faia i le Aso Lulu na tatala ai le fonotaga, le alofa tulai o tauaiga ma faigauo e ala i asiga na ma’au ai i taumafa e pei o manu papalagi, manu mai le fagaga, ma pusai’a.
