O avanoa o fesili ma tali i faiga faapalemene a Malo o le Taupulega e aofia ai Samoa, o se avanoa tāua lea e avatu ai ni fesili a faipule i soo se mataupu e manaomia ai ni tali, e le gata o le itu a le Malo ae faapea foi i le Itu agai ma isi pati faaupufai.
Ua faailoa e le Fofoga Fetalai i taualumaga a le fono usu a Samoa i lenei vaiaso o le a toe faaaoga i le paeaiga lona 17 lenei a le Palemene lea faiga faapalemene, ona e tāua tele e malamalama ai faipule i ni mataupu o loo fia maua ai ni tali poo se faamalamalamaga.
O mataupu talu ai nei e pei o le vaa na sau mai Amerika Samoa e leai ni pepa, ma le mataupu i le lē tausisia e se vaa la’upasese o lona taimi e alu ese ai ma le uafu i Salelologa, o nisi ia o mataupu e tāua ai ni fesili a faipule i le itu a le Malo.
Peitai o le avanoa i le Aso Gafua o le vaiaso nei na ave e le Fofoga Fetalai e tuuina atu ai ni fesili i soo se mataupu, e leai ma se fesili na tuuina atu a se faipule i le failautusi o le fono aoao.
Le afioga i le Fofoga Fetalai, Susuga Papalii Li’o Oloipola Ta’eu Masipa’u
