I le faatulaga ai o le aso 14 o Oketopa le Aso Faraile lea o le vaiaso asau, e lau ai se faasalaga o moliaga o Daryl Mapu o lona umia o le pauta faasāina o le aisa, ma le umia o ni laau malosi e le faatagaina, o lea ua tuuina atu e lana loia se talosaga e toe apili ai le faaiuga na faamaonia ai ia moliaga solitulafono.
O Daryl e pei ona silafia o se tasi sa galue i le Ofisa o le Komisi o Faigapalota ma sa avea ai o se tasi o sui Komesina o faigapalota. O le isi o tagata faigaluega sa molia faatasi i laua o se tamaitai ua le faamaonia ona moliaga sa tuuaia ai. O le aso 17 o le masina nei e toe valaau ai le talosaga apili a Daryl Mapu, sei tālia se tali a le itu a leoleo.
Isi lipoti mai le Faamasinoga
I se tasi o mataupu, o le talosaga a le tamā o Aui’a Fereti Moefiti e tatala i tua i ni aiaiga e faatali ai le aso o lona faamasinoga, o le a toe valaau i le aso 17 o le masina nei, sei tālia ai se tali atu a leoleo.
O Aui’a 54 tausaga o le soifua e 6 moliaga o loo tuuaia ai ona o le faalavelave na maliliu ai ni tagata se toalua i Fogāpoa i Savaii i le masina o Iuni o le tausaga nei.
I se isi o mataupu o se tamaitai o loo molia i ni tuua’iga o lona sainia faamalosi o le suafa o le Ofisa Sili o le pulega o le Matagaluega o Alamanuia Pisinisi ma Leipa, i pepa o talosaga a le aufaipisinisi mai fafo e lei tuuina atu sana tali i ona moliaga.
O Retina Faitasia Tuiletufuga sa galue i lea matagaluega a le Malo, o le a toe tulai i le Aso Gafua 17 o Oketopa sei muamua feiloai ma lana loia, i moliaga e fa ua faamautu a leoleo ona maua ai lea o sana tali pe ioe pe tetee i ia moliaga.
