O le toe faaauau ai o fonotaga a le Palemene i lenei masina o Mati, ua toe foi ai galuega a le Fono Aoao Faitulafono i le folasia i le maota fono o lipoti a komiti faapalemene, ma faailoa ai itu lelei ma itu faaletonu i sailiiliga a komiti i galuega faatino a Faalapotopotoga ma Matagaluega a le Malo, ma faailoa ai e minisita tali a le Malo i fautuaga a komiti.
O se tasi lea o galuega tāua a le Fono Aoao ua tele tausaga ma paeaiga faapalemene ua tuanai, e lei toe aliali ane pe a fono le Palemene.
Peitai ua faailoa e le afioga i le Fofoga Fetalai le susuga Papalii Li’o Oloipola Ta’eu Masipa’u, o le a toe faaauau, ona e iai ona itu tāua aemaise o se tasi lea o galuega ma matafaioi a le Fono Aoao o le soalaupule ma talanoaina lipoti a komiti.
O le Komiti faapalemene mo le Matagaluega o Alamanuia, Pisinisi ma Leipa, faapea le lipoti a le komiti mo le faletupe tutotonu o Samoa na amata ai felafolafoaiga ina ua toe tauaofia le Fono usu a le atunuu i le Aso Lua.
