O Ianuari o le tausaga fou 2023 ua faamoemoe e toe amata ai galuega masani a le Faamasinoga o Fanua ma Suafa i le suesueina o talosaga ua faaulu atu ae na taofia, i le lata nei i le 12 masina ona o faaletonu sa aafia ai tulafono fou a lea faamasinoga na pasia ia Tesema o le tausaga 2020.

Ua faailoa e le tamaitai Minisita o Faamasinoga i le Palemene ina ua saunoa e faamalamalama teuteuga o le tulafono o faamasinoga o le tausaga 2020, o Ianuari o le tausaga fou e tatau ona toe foi ai galuega a lea faamasinoga i tulaga masani.

Na folasia lea finagalo o le Minisita le tofa Matamua Vasati Pulufana a o lei pasia ia teuteuga i le tauaofiaga a le Palemene i le po o le Aso Lua.

Ua na o teuteuga e faasino i le tofia ma le filifilia o faamasino faapea ma aiaiga i le faatulagaina o o latou totogi sa talanoaina e le fono aoao faitulafono, ae e leai ni teuteuga o le faavae e faasino i le tulafono autu o faamasinoga o fanua ma suafa o le tausaga 2020 na tuuina atu i le Palemene.

I taualumaga faaiu lava a le Palemene mo lenei tausaga lea ua mae’a ma ua tolopo i le aso 17 o le masina o Ianuari o le tausaga fou, ua pasia ai foi teuteuga o le tulafono taufaaofi e faasino i lafoga totogi, lea ua aiaia ai le pa’ū o le lafoga i luga o nisi o oloa tau taumafa, ae sii le totogi o le lafoga i le totogi o taumafa suamalie e mafua ona o le tau faaitiitia o gasegase lē pipisi poo non communicable diseases.