E to’avalu tamaitai o le a saili ai se Tausala o Samoa e pei ona faamaonia mai e le pulega o le Manaia Event o loo tapenaina lea vaega o le polokalame o le 60 tausaga o le Tuto’atasi o le a taualuga foi iai ma tapenaga o le vaiaso o le Teuila lea e faia ai ma faafiafiaga o le Tuto’atasi.
Ua faailoa e le faauluuluga o le Manaia Event le susuga Leiataualesa Jerry Brunt, e to’alua tamaitai mai Samoa, ae to’aono mai fafo lea e aofia ai le to’atasi mai Amerika, to’atasi mai Niu Sila, ae to’afā mai Ausetalia.
O le Aso Toonai le aso 3 o Setema o le a amata ai le polokalame o le tauvaga e saili ai se Tausala o Samoa, lea o le a amata i le feiloa’iga a tamaitai ma tusitala ma faalauiloa ai foi o latou tagata ma kamupani o le a lagolagoina.
Faaalia e le faauluuluga o le Manaia Event o le to’afā o tamaitai tauva mai Ausetalia ua aofia ai le Tausala Samoa mai le setete o Niu Sa Uelese, to’atasi se tamaitai mai lea setete o loo faaulu ma lesitala mai o se sui tauva tuto’atasi, ma le Tausala Samoa mai le setete o Vitoria ma le isi Tausala Samoa mai le aai tele o Melepone mai lea lava setete o Ausetalia.
