Ua toe siitia nei moliaga o ni alii se toalua i le faalavelave na maliu ai si alii faigaluega e suafa ia Janak Patel i le aso 23 o Novema tausaga talu ai ina ua osofaia le dairy i Sandringham sa faigaluega ai.
O i laua ua suia moliaga e aofia ai Henry Fred ma Shane Tane sa muai molia i le gaoi peitai ua molia nei i le fasioti tagata faamoemoeina faatasi ai ma le isi alii e toatolu ai o Frederick Hobson lea ua faamuta i le asō le poloaiga a le faamasinoga sa faasā ai ona faailoa le igoa.
O Hobson la ma Fred o loo tetee i o la moliaga o le fasioti tagata ae lei iai se tali a Tane mo le taimi nei.
O le maliu o si alii faigaluega lea na afua ai se solo tetee a tagata faigaluega ma le aufaipisinisi ma faapea ona valaau ai i le malo e alagatatau ona faia se isi faiga agai i soligatulafono faapea i le atunuu.
E lei leva ae folasia loa e le malo le paketi e faitau miliona ma faaputugatupe faaopoopo e agai sa’o i le taofia o ia ituaiga soligatulafono.
Ua faatulaga o le masina o Me 2024 o le a amata fofogaina ai le mataupu lenei i le faamasinoga.
