I le ripoti aloaia muamua mai le Malo o Tonga talu ona aafia le motu o Hunga- Tonga-Hunga- Haapai  i se faalavelave faalenatura e ala i le pa ai o se maugamū mulimuli ane aafia le atunuu i  tsunami  ua faamaonia mai ai e to’atolu i latou ua maliliu e aofia ai se tamaitai Peretania, o se tina 65 tausaga le matua mai Mango Island ma se tama 49 tausaga le matua mai Nomuka. E toatasi le tagata na leiloa peitai na toe maua ma o loo soifua pea.

Faaalia foi i lea ripoti le tele o vaega eseese a le atunuu na faaleagaina e le gata o fale o aiga ae faapea fesootaiga faatekonolosi lea e lei mafai ona iai ni fesootaiga e le gata i totonu o Tonga ae faapea i aiga ma uo o loo i atunuu i fafo. O le amataga o le vaiaso nei faatoa maua ai ni fesootaiga ma aiga.  

I se ripoti mai le sooupu a le Pasefika i Niu Sila ia Barbara Dreaver i le amataga o le vaiaso o sapalai o le Cable mo le faaleleia o fesootaiga tau initaneti o loo i Samoa ma e manaomia lea mo le faaleleia o tulaga o fesootaiga faatekonolosi i le va o Tonga ma isi atunuu o le lalolagi. 

E oo mai le taimi nei ua iai nisi o atunuu ua ofo alofa atu i le malo Tonga e le gata o le agai ai o malu o malo e fesoasoani  le toe tapenaina o vaega na aafia ae faapea foi meaai ma vaiinu.