O le vaalele o le sami lea na tofu i gataifale o Ausetalia i Sisifo poo Western Australia, e to’aono le pasese na malaga atu ai ma le pailate e to’atasi, to’atolu o loo tau sa’ilia ma le isi to’atolu o loo togafitia i le falema’i.

Ua lipotia na lavea i Thomson Bay i Rottnest Island i le te’a laititi o le 4 i le afiafi ananafi.

E manatu leoleo o le vaalele laitiiti lea na lavea i Philip Rock i le amataga o le vaega e ulufale ai i le ava.

Na ta’ua e nisi molimau na vaaia le vaalele o maluelue solo se’ia oo ina tau le apaau agavale i se maa ma faaletonu ai.

O loo vaaia i ata le tofu o le isi vaega o le vaalele i le sami a o aga’i atu leoleo ma le aufesoasoani i lea nofoaga.

E to’atolu tagata na sii ane i le falema’i mo togafitiga ma e eseese uma tulaga o manu’aga na aafia ai ae o le isi tagata e to’afā iai e le’i afaina.

O i latou o loo tigaina e aofia ai ma tamaitai e to’alua pe ā ma le ta’i 40 tausaga le matutua.

Ua faailoa i lipoti o le to’atele o le autafafao sa iai i lea faaitu na o latou molimauina lea faalavelave.

Ua faailoa e le 9News o le ituaiga vaalele lea o le Swan River Seaplane Cessna 208 faato’ā taunuu ane talu ai nei i Perth ina ua faamatuu ane mai se kamupani i Perth.

O loo faagasolo i le taimi nei le su’esu’ega.

Puna o Faamatalaga: https://www.9news.com.au/national/rottnest-island-search-underway-after-sea-plane-crashes/008fd6be-04ec-4876-a080-dc7fae750deb