E to’atolu tagata, o latou uma o ni alii Samoa, ua maliliu ae manunu’a tigaina isi ona o le faalavelave tau taavale na tulai mai i luga o le State Highway 1 i le itu i Saute o Aukilani.
O le va o Bombay ma Ramarama lea o loo ta’ua mai i lipoti na tupu ai lea faalavelave e lata i le itula e 2 i le aoauli ananafi.
O tagata e toatolu ua maliliu ai e faapea sa malaga uma mai i totonu o le taavale e tasi o se van, ma o loo lipotia o le toalua o alii e mai Samoa na omai i galuega faavaitaimi ma e faamoemoe e toe taliu i Samoa i le vaiaso nei.
O le isi tagata e toatasi o le avetaavale o le van lea na iai ma nai alii mai Samoa.
I tagata manunu’a e pe ā ma le toavalu i latou ma o nisi lea na faanatinati atu i falema’i i Aukilani.
A o faasolo ai pea suesuega a leoleo i le mea na tupu, ua lipotia o le loli na alu atu mai Aukilani e alu i Saute lea na pa le pa’u ma tifa ese ai mai le itu o le auala na malaga ai ae tifa atu i le isi ituala o loo omai ai taavale mai le itu i Matu.
Na tapunia uma ai ma lanes o le motorway i Bombay mai lea taimi alu ai ma anapo a o faasolo galuega faaleleia e tusa ma lipoti a leoleo ma e oo mai I le taeao nei ua faamaonia mai e le NZTA o lea ua toe tatala.
E faamaise atu ai ma tala fou a lau Radio Samoa i aiga o nai alii ua ma’umau ai soifua ona o lenei faalavelave faafuase’i.
Puna o Faamatalaga: SH1 crash: Road reopens after triple-fatal crash south of Auckland (1news.co.nz)
Three dead in SH1 South Auckland truck crash near Bombay – NZ Herald
