O le aso 22 o le masina nei o Me o le a tutulai ai i le faamasinoga sili ni alii se toatolu ma ni tamaitai se toalua, o loo nofo taofia i le vaaiga a leoleo i le taimi nei, ona o moliaga o le umia o le aisa, o laau faasāina o le maruana ma ni laau malosi poo fana.
O le osofaiga a leoleo i Toamua uta i le Aso Toonai 6 o Me na latou maua ai ia laau ma pauta faasāina aemaise sa maua ai foi ma masini faatekonolosi.
O le manuia o lea osofaiga e afua mai i le galuega a Malu o le Malo o loo suesueina faiga solitulafono e fesootai i gaioiga o loo faafailele ai faiga faasolitulafono i le umia o nakoti.
Ua faailoa ai e leoleo e matuā aafia le soifua maloloina o tagata, ma lamatia foi lo latou saogalemu pe a faaaoga ma tagofia ia tulaga.
Ua ta’utino ai leoleo e le solomuli i le faia o galuega uma mo le sailia o tagata o lotolotoi i ia faiga solitulafono, ma ua ave ai le fautuaga i le lautele o le atunuu ina ia faailoa atu ni nofoaga ma ni tagata o latou faafailele le totō ma le umia o laau faasāina, faapea pauta ma fualaau faasāina poo nakoti.
