Ua tele manatu ma lagona o tagata o loo i atunuu i fafo ua lagalagā i le ‘au a le atunuu le Manu Samoa i le faafitauli o loo tulai mai e ala lea i le tau taofia o le tour o loo fuafua nei mo Europa i le faai’uga o le tausaga.

E pei ona agiga i luga o fesoota’iga televavave le mafuaaga o le lē oo o lenei tour ona e faapea mai le ta’ita’ifono o le Iuni Lakapi a Samoa le susuga ia Tuilaepa Sailele Malielegaoi, ua leai se tupe a le iuni lakapi e tapena ma faataunuuina ai lenei faamoemoe.

Peitai ua toe tafa le finagalo o le ta’ita’ifono ma le komiti, o le a faataunuuina lava le tour a le Manu Samoa i le faai’uga o le tausaga ae o le a fai se sailiga seleni a le Manu Samoa i ona lava tagata ina ia faataunuuina ai le malaga a le Manu Samoa.

O le toatele o tagata i atunuu i fafo o loo iai lo latou lagolago i le ‘au a le atunuu le Manu Samoa, ma ua iai foi lo latou loto e tatau ona faataunuuina pea le tour a le Manu Samoa ae tatau ona faasee ese i latou o loo avea ma Komiti Faafoe o le iuni lakapi.

Auā e lē o se mea fou le faafitauli o loo tulai mai i le iuni lakapi.

O le mea ua leva ona gafa ma le iuni, ma afai ua gata le iloa o le komiti o loo iai i le taimi nei, e saili ai nisi seleni auā le manuia o le ‘au a le atunuu le Manu Samoa ua tatau foi la ona faasee ese latou ae saili atu se isi laulau fou latou te faafoefoeina polokalame a le iuni ina ia mafai ona ausia ma faataunuuina le tele o polokalame o loo mananao iai le Manu Samoa.

Ua faailoa le tele o finagalo o le atunuu i luga o polokalame a le Radio Samoa e tali fiafia lava i le tele o sailiga seleni mo le Manu Samoa auā o le ‘au a le atunuu e faamemelo iai ma tapua’ia e le atunuu pe a oo ina masii.