Ua lipotia nei le to’atele ma le maualuga o le numera o fanau e vaetama mai i le atunuu ua aafia i sauāga matagā ma le sauāina, ma loka i fale e mātua na vaetamaina mai i latou.
Ma o ni tagata o iai ni faamaumauga o nisi sa aafia i soligatulafono.
O lipoti nei mai le faamasinoga ma nisi o faalapotopotoga o loo feagai ma mataupu tau le soifua mālōlōina lelei o fanau i totonu o Niu Sila.
I nei lipoti na faamauina ai se tama talavou e 12 tausaga le matua o loo aofia ai i le to’atele o fanau o loo aafia nei.
Ua faailoa o lenei tamaitiiti na aumai i Niu Sila ma faafaigaluega ai faasolitulafono ma na sauāina e mātuafai, e ui lava o lona tamā na vaetamaina mai o ia, sa molia muamua foi i le tulafono i le tele o mataupu tau i sauāga.
I le faatupula’ia ai o nei mataupu, ua faamanino e le Ofisa o Femalagaa’iga a Niu Sila, e lē o sa latou matafaioi le iloilo ma su’esu’e o tagata poo mātua e vaetama ane ai fanau, pe a oo ina su’esu’eina le mafai ma le lē mafai ona talia le visa o le tamaitiiti e ulufale ai i totonu o Niu Sila.
Ae i faamaumauga mai i se tasi o sui e nafa ma mataupu i le aumai faasolitulafono o tamaiti e faaaogā ai auala o le vaetamaina o fanau o se metotia ua autausagā o faatino e le to’atele e ui i le tele o fautuaga ma lapata’iga i le tele o ofisa ma pulega i le faatupula’ia o lenei mataupu ma le tele o itu o loo mafai ai ona alia’e nei aafiaga.
O se faata’ita’iga sili o lenei mataupu tugā, o le mataupu lea na alaia’e mai i le tausaga 2018 i le aafia ai o se tasi sa molia ma faasalaina i sauāga matagā.
E atulasi mataupu na faaalia ae o le fesili tele o loo alia’e mai, poo iai ea ni fofō i le taofia ai o nei faiga ma le tula’i mai i fanau e vaetama mai i totonu o Niu Sila.
Puna o Faamatalaga: https://www.rnz.co.nz/news/national/558730/saving-sione-children-being-adopted-overseas-trafficked-to-work-in-new-zealand
