Ua matuai faailoa le lē fiafia o le sooupu a le National mo le soifua maloloina, Dr Shane Reti i le faiga faavae a le malo, le Equity Adjustor Score ua iai nei ua faatulaga ai tagata e tutusa aganuu, talitonuga ma gagana ma tulaga faapea e fua agai iai poo ai e ave iai le faamuamua pe a faia taotoga, fai mai Reti o se faiga e lē logolelei ma e sese.
Ua saunoa Reti pei ona lipotia e le Herald e le tatau ona aofia fua tupuaga o tagata i tulaga faapea tau togafitiga ma taotoga ma ua ia unaia ai le malo e faataatia ese lea aiaiga.
Na ia ta’ua foi o le auala e faaleleia ai le soifua maloloina o tagata Maoli ma le Pasefika o le faaleleia lea o fale ma aoaoga aemaise le tau o le soifuaga ae le o ni tulaga e tuuina ai ni avega i nisi.
Na faailoa e le alii fomai e le mafai ona ia faatulaga ni gasegase e fua i ni o latou tupuaga ma e tutu faatasi ma fomai faapitoa ua faailoa lo latou le fiafia i lenei faatatau a le Health NZ.
E tetee foi le taitai o le ACT, David Seymour i lenei faiga.
E toatele e le o lagolagoina lenei faiga fou ae fai mai le sui o le Te Whatu Ora Aukilani o Dr Mike Shepherd i le lipoti, na o latou faatulaga le faiga lea e aofia ai ma le tulaga i tupuaga ona o le faamautuina o se gap o loo iai i tagata Maoli ma Pasefika e uiga i le taimi e aafia ai i auga o gasegase ma le taimi e maua ai se avanoa i se taotoga,
O se mataupu sa o latou galulue ai ma o se tasi lea vaega o le sailiga o le tali o lea vaega ma e lei faia ina ia vaai ai poo ai o le a muamua i le queue.
