Ua faamaonia mai e leoleo le tapunia o se vaega o le Southern Motorway i Aukilani i le agai i le itu i Matu ona o se faalavelave tau taavale na tulai mai ai i le lei taina o le 10 i le taeao.
Fai mai e tolu taavale na aofia i le faalavelve ma o auala e ui agai i le va o Papakura ma Takanini na tapunia ai.
Na faailoa e leoleo o suesuega na muai faia ua iloa ai e toatasi le tagata o loo manu’a tigaina ma o loo faaauau le suesuega e le vaega e feagai ma faalavelave tuga.
O le fautuaga i tagata femalagaa’i mai leoleo, ia faatuai teisi nisi o fuafuaga pe faamautinoa o loo lava le taimi e faimalaga ai ona o le poloka o le alatele.
