E toatasi le sui tauva o le a finau i le fu’a a le vaega faaupufai o le Faatuatua i le Atua Samoa ua Tasi, i le palota laititi a le itumalo faapalota o Vaimauga 3, o le a faia i le Aso Faraile le aso 24 o le masina lenei o Fepuari.

O le Aso Tofi nei o le a momoli atu ai le sui tauva le afioga Lautimu’ia Uelese Vaai, i le vaega faaupufai ma o le aso foi lea o le a tatala ai le faauluina o suafa o sui faatutū mo lea palota laititi.

O lea tamalii sa avea ma Ofisa Sili o le pulega o le Kamupani vaa a Samoa, ae ua faailoa e se molimau faatuatuaina ua faamavae ona ua sauni e tauva i le palota laititi a lona itumalo.

Sa tauva muamua o ia i le palota tele o le tausaga e 2016 mo le nofoa o Vaimauga Numera Tasi poo Vaimauga i Sisifo, ma sa ia ausia le tulaga lua i le aofaiga o palota na ia maua e 898.

Sa tauva o ia ma isi sui e toalua o le afioga Patu Sola Siaosi na tulaga tolu, ma Lenata’i Faafoi Victor Tamapua na tulaga muamua i palota e 1,150 na ia maua.

Ua toe vaevae le itumalo lea o le Vaimauga ma ua avea ai nisi o nuu ma afioaga i le lio o le itumalo o le Vaimauga numera 3 e pei o Magiagi, Faatoia, Vini, Maagao, Matautu tai ma Matautu uta, Lelata, Letava, Leonē, Vaisigano, Vailima, Vaoala, Afiamalu, Papaloloa, Papauta, Tanugamanono, Tiapapata, Avele, Nafanua, Tanumaleko, Malololelei, ma Tiavi.

O le a iloa ni sui faatutū o le a tauaveina le fu’a a le vaega faaupufai e puipuia aiātatau a tagata ma ni sui tauva faatutoatasi, pe a tapunia le lesitala o sui tauva i le Aso Faraile nei.

O le Vaimauga 3 na manumalo mai ai le sui o le vaega e puipuia aiātatau a tagata i le palota tele o Aperila o le tausaga 2021.