E 31 tausaga ose alii ose tagatanuu o Niusila ae 33 tausaga ose alii foi o se tagatanuu o Samoa na molia e leoleo ile aso Lulu o le vaiaso nei in le solitulafono o le taupulepule e faao’o le maliu i se isi taule’ale’a o se tagatanu’u o Ausetalia.

Ua faailoa i se pepa o faasalalauga mai le auaunaga a leoleo o le malo o Ausetalia le Australian Federal Police ma le Matagaluega o Leoleo i Samoa, o lea tauplepulega na faatino ai se gaioiga i le atunuu o Vietnam i le masina o Me o le tausaga nei lea o loo molia ai i le fasioti tagata faamoemoeina ni ali’i talavou mai Samoa lea ua savalia nei le fā masina o taofia e leoleo i le atunu’u o Vietnam.

Advertisement

O su’esu’ega sa faia ma molia ai ia tagata e toalua e leo faailoaina suafa ua faailoa ai foi e leoleo Ausetalia ma Samoa, o ali’i talavou e toalua o loo taofia i Vietnam, sa aafia faatasi ma le toalua ua molia i Samoa i le taupulepulega e faatino le solitulafono, e pei ona maliu ai le tagatanu’u o Ausetalia, ae faamanu’alia foi se isi taule’ale’a o se tagatanuu foi o Ausetalia.

Ua faafetaia e leoleo o lea malo le galuega a leoleo i Samoa ma faailoa ai, o se itu tāua lea i le galulue faatasi o leoleo o atunu’u e lua ma leoleo i Vietnam i su’esu’ega o lea gaioiga solitulafono. O loo tatala ali’i e toalua ua molia i le auai i se taupulepulega e faao’o le maliu i ni aiaiga.

O James Atua ma Fred Papalii o nisi foi o loo molia e mafua i su’esu’ega e agai i le solitulafono na faatino i Vietnam lea o loo molia i moliaga o le aafia i le fa’aaoga o tupe ‘ele’elea, tu’uina atu o faamatalaga sesē i leoleo, ma le faia o se gaioiga fa’aalātua.

O le vaiaso nei e pei ona lipotia e le nusipepa o le Samoa Observer na ave ma taofia i le ofisa autū o leoleo ni taavale o le pisinisi car rental o le Unalei ona o su’esu’ega lava o loo faagasolo i le sāilia o sootaga i Samoa i le faalavelave i Vietnam.