E toalua alii e tatau ona tutulai i luma o le faamasinoga e tali i o la moliaga e faatatau i se vevesi na tulai mai i le va o le kegi a le Mongrel Mob ma le Black Power i Palmerston North.
Ua ta’ua i lipoti a le Stuff o le faalavelave na tupu i le masina o Aokuso lea na fasiotia ai ma le sui o le Mongrel Mob o Hori Gage i le driveway o lona fale.
Sa faailoa muamua e leoleo e lua mataupu e iai sootaga ma i se lipoti lata mai la i le asō ua faailoa ai e le satini suesue o Dave Wilson, e talitonu leoleo o le fasiotia o Hori o le tali lea o le vevesi na tulai mai.
Na tupu vevesi ia i totonu ma fafo mai o le Castle 798 i Main St na manu’a ai foi se tasi sui sinia o le Black Power ina ua faaoolima iai se tasi.
O Hori na fana i luma o si ana fanau ma lana paaga ae lei iai se tasi ua molia e leoleo i lona maliu.
O i laua ua molia e 25 tausaga o le isi mai Porirua e tulai i le faamasinoga i le Aso Faraile ma le isi e 18 tausaga mai Ueligitone e tulai i le faamasinoga i le aso 26 o le masina nei.
