E toalua mafine ua molia nei ona o se feeseeseaiga na tulai mai i le Faleoloa a le Kathmandu i Sini Ausetalia i le amataga o le vaiaso lea e masalomia na mafua ona o se gaioiga faasolitulafono poo le gaoi.
I lipoti a le 9News na faailoa ai o se tasi o manager na ia masalomia le ave faagaoi ai e se tasi o tamaitai le lauulu faapipii (wig) mai se tasi o faleoloa i totonu o le Shopping Centre a le Westfield Parramatta i le 5:30 i le afiafi o le Aso Gafua. Ma e iai masalosaloga o le vevesi tele na tulai mai ina ua faatonuina e toe tuu le meatotino i le mea sa iai.
E 19 ma le 22 tausaga o nei tamaitai ma ua faamaonia mai e leoleo le molia ai o i laua i le faaoolima (assault) ae mo le tamaitai 19 tausaga le matua o loo molia foi i moliaga e lua o le gaoi.
O loo faaauau pea suesuega a leoleo i lea mataupu.
