I le lata ai ina mae’a le galuega o le lesitalaina o tagata palota mo itumalo faapalota o Siumu, Vaa o Fonoti, ma Faleata 4, ua manino mai i tapenaga mo ni sui tauva mo palota laiti a ia itumalo e tolu, e toalua sui mautinoa o le vaega e puipuia aiātatau a tagata o le a taufetuli i le latou fu’a mai itumalo o Vaa o Fonoti ma Siumu, ae leai so latou sui tauva mo Faleata 4.
Ua na o se sui tauva sa tamoe muamua i le HRPP i ni palota ua tuanai, o le a tauva mai lea itumalo o se sui tutoatasi o le tofa lea ia Ulu Bismark Crawley.
O le faalauiloaina o sui tauva e toalua o le vaega e puipuia aiātatau a tagata mo Siumu le tofa Tuu’u Amaramo Sialaoa, ma le tofa Leausa Dr Take Naseri mo le palota laititi a Vaa o Fonoti, na faailoa ai e le taitai le susuga Tuilaepa L Sailele Malielegaoi, o le leai o se sui tauva mo Faleata 4 ua logosaia ai e lana pati faaupufai le finagalo o loo iai le finagalo o lea itumalo.
O le fono a afioaga mavae o le itumalo o Faleata 4 i le Aso Gafua o lenei vaiaso na faamautu ai le tauva faatutoatasi o le tofa Ulu Bismarck Crawley.
Mo le silafia o aiaiga o le tulafono o faigāpalota a tauva faatutoatasi se sui faatu mo se palota e saili ai sui usufono o le Palemene ae manumalo, e mafai ona filifili poo fea se pati faaupufai e lagolago iai ona lesitala ai lea o lona suafa a o lei faatauto i lona tofi faipule.
E mafai foi ona faaauau lona avea ma sui tutoatasi i totonu o le Palemene pe a lē fia lagolago i se pati faaupufai.
