Ua lipotia e le ABC e toalua alii ua pueina e leoleo ona o se taupulepulega e faaoo le oti i ni alii pepese e toafā mai Western Sydney le kulupu e faaigoa o le OneFour.
O faamatalaga a leoleo ua feta’ua’ina ai o alii ia e toalua ua pueina e iai lo la sootaga i se kulupu solitulafono ae sa faakonekarate foi e faaoo le oti ma ave faamalosia nisi mai isi kegi.
Ua ta’ua i le lipoti o faamatalaga mai leoleo i le latou suesuega i kulupu solitulafono faavaomalo mai Lepanona ua feta’ua’ina ai e leoleo na o latou iloa ai nisi o fuafuaga e fasioti le aupepese mai Mt Druitt.
O le OneFour sa aofia i se faapitoa a le Netflix i le tausaga talu ai.
Fai mai le lipoti e leai ni faamatalaga o ta’ua ai e aafia se sui o le OneFour i ni gaioiga faasolitulafono.
O le taeao analeila na osofai ai e leoleo se fale i Western Sydney ma pue ai alii e 26 ma le 20 tausaga le matutua.
Ta’ua i le ABC o sui o le aufaipese lea a le OneFour e aofia ai Spencer Magalogo, Jerome Misa ma Pio Misa.
