Talu mai ona lē oe iai Samoa i tulaga o Faalavelave Faafuasei poo le State of Emergency sa lē toe tuuina mai ai ni lipoti o le tulaga lata mai o iai le Koviti i Samoa. Peitai o lea ua toe amata faailoa mai lipoti lata mai o iai lea faama’i i totonu o le atunuu.
I le lipoti a le Matagaluega o le Soifua Maloloina mo le fitu aso (tasi le vaiaso) ua faamauina ai e to’a 64 i latou ua lesitalaina le pesia ai i le siama o le Koviti-19 i totonu o Samoa mai le 2:00 i le aoauli o le aso 14 o Aokuso e aga’i atu i le 2:00 i le aoauli o le aso 21 o Aokuso 2022.
Ua siitia ai nei le aofa’i o i latou ua aafia i totonu o le atunuu faapea i latou o loo malaga atu i Samoa i le to’a 15,767. I lea fuainumera, e 15,598 i latou mai i le mamalu lautele o le atunuu (community transmission), ae 169 le aofa’i o i latou na faimalaga atu i totonu o Samoa ua aafia i le faama’i talu mai le masina o Mati. E to’a 8 o loo faataotolia mo le taimi nei i le Maota Gasegase i Motootua.
O loo tumau pea le fuainumera o i latou ua ma’umau soifua ona o le faama’i i le 29 ma e lē o muta ai le faamanatu pea a le Matagaluega i tagata lautele ina ia tausisia pea fautuaga mai le Soifua Maloloina.
