E to’a 6 talavou ua pu’eina e leoleo i le mae’a o le faalavelave na osofa’ia ai le pule o se fale pizza i Sini i le po anapo.

Lipotia e le 9News o loo faia nei le su’esu’ega ua faaigoa Strike Force Narrira i le mae’a o lea faalavelave na maua atu ai se alii 58 tausaga i luga o Great Western Highway e lata i Kingswood o loo faamanu’alia i se manu’aga i lona fatafata.

Sa togafitia ai e le vaega o fesoasoani faavavave le tagata lea ma ave atu i le falema’i i Westmead na maliu ai lava i le te’a o le 12 i le vaeluaga o le po anapo.

Ua faailoa e le ta’ita’i leoleo mai Niu Sa Uelese Trent King ua pu’eina e leoleo talavou e to’a 6, to’a 4 alii ma tamaitai e to’a 2 ma o loo i le vaaiga a leoleo a o faia su’esu’ega.

Fai mai e iloa lelei e leoleo ia talavou ma o si alii ua maliu e ana le fale pizza e pei ona ta’ua, e alofagia ma iloa tele i le komiuniti ma ua silia ma le 14 tausaga o lana auaunaga ma ua faailoa le mafatia o si ona aiga.

Fai mai leoleo o loo faagasolo le su’esu’ega.

Puna o Faamatalaga: https://www.9news.com.au/national/kingswood-news-homicide-investigation-under-way-after-man-fatally-stabbed-near-sydney-train-station/297a4ae5-669d-41ed-a444-18487634f5d9