O le umi o faatali pe fia se tupe mai le Malo e faameaalofa i sui o le aulakapi liki a le atunuu o le Toa Samoa ma le pulega, na faatoa manino ma iloa le aofaiga o lea meaalofa i le tali faaaloalo a le Malo na faia i le afiafi o le Aso Faraile na tea nei i le faletalimalo o le Taumeasina Island Resort.
E 140 afe tala le seleni atoa na tufatufa ma tauaao ai e sui e toa 28 o le Toa Samoa le ta’i le lima afe tala a le tagata e toatasi.
O le seleni lea mai le Malo e ala ai i le pulega o tupe teu faavaomalo le Samoa International Finance poo le SIFA, lea e iloa foi i le igoa o le International Business Finance Center poo le IBFC.
O le itutino foi lea o le Malo na latou lagolagoina le tatou aulakapi liki ma ave iai le limaselau afe tala na faatupe ai le malaga mai i lo tatou atunuu o le Toa Samoa.
O le amataga o le vaiaso nei na toe tuua ai le atunuu e sui o le tatou aulakapi liki ma ua toe taliu i atunuu o loo faamautu ai.
O sui o le Toa Samoa e pei o le to’afa o loo faamautu i Egelani ma taaalo ai, o loo maua foi meaalofa tupe tai lima afe tala.
O le malaga a le aulakapi liki i Savaii i le faaiuga o le vaiaso na faaee ai suafa matai i nisi o tama o le ‘au e pei o le kapeteni ia John Paulo, o Kelma Tuilagi ma le faiaoga ia Matt Parish.
O le tasi o tama o le Toa Samoa Joseph Su’aalii na faaee foi lona suafa matai i le afioaga o Satitoa i le motu o Upolu i le tau amataga o Tesema o lena tausaga a o lei taunuu le ‘au atoa mo le tali faaaloalo a le Malo ma le atunuu.
