O tamaiti ia ua aafia i le faalavelave ua lavea ai se pasi aoga i Melepone i le aoauli ananafi.
O lipoti a le ABC ua ta’ua ai o le pasi na soso’a mai le pito i tua e se loli i le fetaula’igaala i Eynesbury i le taimi o le tuua o aoga.
E 45 tamaiti aoga mai Exford Primary sa i luga o le pasi ma sa mafuli a o mimilo i le fetaula’igaala lea ma ua lipotia mai o le toatele o tamaiti e tigaina manu’aga.
Ua faamaonia mai e le sooupu mai le falemai o tamaiti e moni sa taofia tamaiti i le falemai i le aso ananafi ma isi sa faia iai taotoga ona e tuga manu’a.
O le matutua o tamaiti e mai le 5 i le 11 tausaga ma e oo mai i le taimi nei e toafitu o loo taofia pea i le falemai i tulaga tigaina.
E toaono tamaiti na togafitia foi i le isi falemai i le Sunshine ma e toatolu o loo taofia pea.
Fai mai leoleo o le aveloli e 49 tausaga o loo fesoasoani nei i suesuega o loo faia.
Faaoo faamaisega a leoleo i aiga o nai tamaiti ua aafia a o faatalia ai se iuga o le suesuega poo le ā tonu le mafuaaga o lenei faalavelave.
