E toalua tagata o loo iai i se tulaga tigaina ma le isi e feololo manuaga mai se faalavelave tau taavale na tulai mai i Puni i le itu i Saute o Aukilani.
Na ta’ua e leoleo na valaau ane i latou i le faalavelave lea i le aoauli ananafi i Rogers Road, e toatasi le tagata na aafia i le faalavelave lea fai mai sa i fafo mai o le taavale i le taimi na tupu ai, ma sa taumafai ane tagata sa iai i lea nofoaga i le aveesea mai o lea tagata i se nofoaga saogalemu.
Na agai atu iai vaalele helicopter ma le auaunaga a le fuimu ma ua ta’ua i le Stuff o se teineititi talavou na aveina ane i le falemai i Middlemore e tigaina.
O le isi foi tagata na aafia na ave ane foi i le vaalele i le falemai ma le isi sa ave ane i le taavale a le falemai.
O loo faaauau suesuega i le mafuaaga o le mataupu.
