Ua faasā i le atumotu e faaigoa The Maldives tagata e umia tusifolau Isaraelu mai le toe ulufale atu i o latou laueleele.

O lea vaega o le lalolagi e i le vasa Initia ma ua faailoa i se faamatalaga mai le ofisa o le latou Peresetene o loo latou tuua’ia Isaraelu i le tele o tagata Palesitina ua maliliu i le taua i Gaza e ui o loo faaauau pea ona teena e Isaraelu ia tuua’iga.

O le Peresetene o le Maldives o Mohamed Muizzu sa ia faia le teuteuga lea i le tulafono o femalagaa’iga a le atunuu ina ua pasia i le vaiaso nei e pei ona faailoa i le lipoti a le CNN.

O ia teuteuga e aofia ai ma se fuaiupu i le Tulafono tau femalagaa’iga ua faasā ai le ulufale atu o tagata asiasi e iai tusifolau Isaraelu.

Ua atagia ai le tulaga o iai le finagalo o lea faigamalo i le tali atu i le tele o le mau tulaga ua tula’i mai ma tagata maliliu i osofa’iga a Isaraelu sa faia i tagata Palesitina.

E lē o iai se tali mai le ofisa o le va i fafo a Isaraelu i lenei gaioiga.

O Aferika i Saute ua o latou tuuina se talosaga i le mataupu lea i le faamasinoga faavaomalo a Malo Aufaatasi ma le Amnesty International ma tuua’ia ai Isaraelu i le fasiotia o tagata Palesitina i Gaza.

O tagata tafafao atu i le Maldives e aupito tele ai tupe maua a lea atunuu ona o le matagofie o ona matāfaga ma laufanua ma o loo lipotia e oo atu i le 5 piliona i le tausaga tupe maua mai tulisi fesoasoani ai i le tamaoaiga o le atunuu.

Puna o Faamatalaga: https://edition.cnn.com/2025/04/16/africa/maldives-bans-israeli-passports-intl-latam/index.html