O le iva masina ua tuanai o feagai le itumalo o Sagaga 3 ma ni to’a i le lotoifale o feteenaiga o manatu ma finagalo e mafua i le poloketi tasi le miliona tala, o lea ua taoto i lago tonu ni faafatiatama’i sa lukaluka ai le gataifale o le itumalo, ma ua amata tali nei faamanuiaga o le latou tasi le miliona mai le poloketi o le atina’e manuia o itumalo e 51 o le atunuu.

O le vaiaso nei na faatoa saini ai le vaega tupe e 150 afe o le miliona tala muamua mo Sagaga 3, ma faasolosolo ai ina faamatuu iai le 850 afe lea e muamua ave le ‘afa e 425 afe pe a mae’a faamalieina aiaiga o le tuuina atu o lipoti ma faamatalaga e faailoa ai le faaaogāina o seleni o le poloketi.

Faaalia e le Minisita o Tupe o le a faasee atu i le masina fou e tauave le vaaia o le Matagaluega o Tina ma Tamaitai Atinae o Afioaga ma Aga Fesootai o loo vaaia le faagaioia o lea poloketi tāua le afioga Mulipola Anarosa Ale Molioo, sa faatino se feiloaiga a le matagaluega ma sui o le itumalo ma talia ai e Sagaga 3 se tuualalo, e pei ona amata ai ona saini a latou vaegatupe o le miliona tala muamua.

O Sagaga 3 ua aofia ai Leauvaa-uta ma Leauvaa-tai faapea le mamalu o le atunuu o alala i Aleisa.