Ua faatulaga le aso 19 o Aokuso e valaau ai molimau a leoleo e lagolago ai le moliaga o le faia o ni tala taufaaleaga, ina ua teena e le susuga Tiumalumatua Maifea Fetu lea moliaga ina ua tula’i i le faamasinoga faaitumalo i le Aso Lua o lenei vaiaso.
O lea tamalii o se tagata faasalalau i sana tautua tau leitio i luga o upega tafailagi i totonu o Sini Ausetalia. O loo molia o ia i le faia o faasalalauga taufaaleaga i lalo o aiaiga o le tulafono tau soligatulafono le criminal libel, o lona faasalaga pe a faamaonia o le salatupe poo le falepuipui. O loo tatala o ia i tua i aiaiga e pei o le taofia o lona tusifolau, e faatali ai le faai’uga o lona faamasinoga.
O le Aso Faraile nei le folasaga faai’u a loia i se isi o mataupu faapea o loo molia ai se alii sa avea ma leoleo o le Malo o Paepaetele Junior Betham, i lona faia o se tuua’iga taufaaleaga i se tamalii sa avea ma leoleo sinia ae o lē sa avea ma sui fofoga fetalai o le Palemene.
O le polokalame o le Lauao Sinasina a le fale televise o le EFKS TV2 ia Mati o le tausaga na te’a nei na faasalalau ai lea tuua’iga taufaaleaga ma o le mae’a tuuina atu o folasaga faai’u a loia o le a iloa ai se aso e lau ai le faai’uga o lea mataupu.
