E 26 moliaga a leoleo o le faia o ni faiga faasoesa e ala i ni tala taufaifai ma tala taufaaleaga i luga o auala o fesootaiga faaonaponei le api o foliga le facebook, ua tuuaia ai le tamaitai o Perkin Tauvao, e iloa foi i isi ona suafa o Salote Syrah Tautai ma Perkin Feagia’i Headle, ma e aumau o ia i Amerika, ae ua le mafai ona toe foi ona o ia moliaga solitulafono.
O le Aso Faraile na tulai ai i le faamasinoga faaitumalo ma tuuina atu ai e lana loia lana tali tetee i le 26 o moliaga a leoleo, ma ua faatali ai nei se aso e faatulaga e suesue ai molimau, ae o le a iloilo muamua lana talosaga e tauala atu i lana loia, i lona fia tuua lea o Samoa ma le faamoemoe e toe foi mai e tali i ona moliaga.
O le aso 10 o le masina fou o Novema o le a iloilo ai lea talosaga ma aumai ai se faaiuga o le a iloa ai pe talia pe teena lona malaga ese ma Samoa.
O loo tulai le alii loia o Faimalomatumua Mathew Lemisio mo lea tamaitai, ae o le tamaitai loia galue tutoatasi Leinafo Taimalelagi Strckland o loo finauina moliaga a leoleo.O le Aso Faraile o le vaiaso nei e tatau ona tuuina atu ai se tali a le itu a leoleo i le talosaga o le fia alu ese ma le atunuu o Perkin Tauvao, Salote Syrah Tautai poo Perkin Feagiai Headle
