O le Aso Lulu o le vaiaso nei e finauina ai e le loia o loo tulai mo Edward Fanueli, le talosaga a lē ua molia e tatala i tua i ni aiaiga e faatali ai le aso e valaau ai molimau a leoleo, e lagolago ai moliaga e lima o Edward e aofia ai ma le solitulafono matuia o lona faaoo o le maliu i se tamaitai sa avea ma leoleo poo Malu o le Malo.
O le toe tulai o lē ua molia i le faamasinoga i le amataga o lenei vaiaso na tuuina atu ai lana tali tetee i moliaga. O lē na maliu i le solitulafono ua tuuaia ai Edward Fanueli o Mele Lapana o se tamaitai 31 tausaga o le soifua sa galue o se leoleo.
O le vaiaso tonu a o lumanai le Kerisimasi o le tausaga na tea nei na tulai mai ai le faalavelave i Aleisa, lea sa faailoa ai e leoleo o se aupega malosi o se fana laititi sa umia e lē ua molia ma ia faatino ai le solitulafono.
O lē ua molia ma lē ua maliu sa uo. O loo nofo taofia pea Edward i le vaaiga a leoleo talu mai le aso na tupu ai le faalavelave.
