O le aso 2 ma le aso 3 o Novema ua faatulaga e le faamasinoga faaitumalo e valaau ai molimau a leoleo, ina ua teena e le Ofisa Sili o le Pulega o Malae ma Faletaalo le susuga Moefaauo Salale Moananu, moliaga e lima a leoleo, e aofia ai le faaoolima, tau faamata’u e faaoo le oti, umia o se aupega mata’utia, umia o se laau malosi e le’i laiseneina, ma le tauaveina o se laau malosi.
O le isi tagata o loo molia i le mataupu lenei o se faipisinisi le susuga Fata Paul Loibl, ma o loo tuua’ia i lona ave lea o se laau malosi i se isi tagata, ma le umia o se laau malosi e le’i laiseneina faaletulafono. Ua teena foi e lea tagata faipisinisi moliaga a leoleo, ma o Novema foi o le a su’esu’eina ai molimau e lagolago ai ona moliaga faapea foi ona tuuina atu ai ni ana molimau e lagolago ai lana tali tetee.
I se mataupu mai leoleo, o loo faia su’esu’ega i le maliu o se taulealea e pei ona faailoa e le Komesina le susuga Auapaau Logoitino Filipo, o loo masalomia na lavea lē ua fano le soifua i se mea faigaluega e ta’ua o le puffer. O le galuega o se fale i se afioaga i Savaii na tulai mai ai lea faalavelave i le Aso Gafua o lenei vaiaso.
