O le sefulu tausaga ua mavae talu ona amata le tautua a le Toomaga mo ē Puapuagatia, o lana laina telefoni e valaau atu ai le atunuu mo se fesoasoani i ni mafatiaga, sa na o tagata lava na sauaina na sulu atu i lea laina telefoni mo se fesoasoani.

O le taimi lenei ua faailoa e lea faalapotopotoga tuma’oti, ua oo lava i mataupu tau lotoifale e pei o le faaeeina o suafa matai, o le alu o le tamaloa e tafao i pati o aso fiafia ma se isi faala’ila’i ae faamuli lona toalua ma le fanau i le fale ua sulufai uma i lea laina telefoni mo se fesoasoani.

Ua faailoa i faamaumauga a le Toomaga, e 100 lava valaau i faafitauli tau lotoifale o aiga na oo atu mai le taimi a o lumanai le Kerisimasi seia oo i le aso 3 o le masina amata o lenei Tausaga Fou.

E 70 pasene o ia valaau o mataupu tau faafitauli i le lautele o le atunuu, ae o le 30 pasene o valaau i mataupu tau i sauaga i totonu o aiga.

O le auaunaga a le Toomaga ua iai tagata aoaoina lelei, o i latou ia latou te faatalanoa ma tagata e valaau atu o latou faafitauli, ma tuuina atu iai le fesoasoani i ni fautuaga e fofo ai se mafatiaga ua aafia ai.

O lea auala o fesootaiga mo tagata e afea e ni faafitauli ma mafatiaga ua faaaogā nei e le toatele e fai ma talipupuni e taofi ma tetee atu ai i sauaga o loo faia e nisi, ma aafia ai le lotoifale o aiga i le va o ulugalii, le va o mātua ma fanau faapea le va lautele o matai ma o latou auaiga.