Atonu e lē manatu mamafa iai le toatele i nisi taimi peitai e ao foi ona nofouta iai ma silafia ona e ono tele se vaegatupe e ma’umau ai ma faaopoopo ai foi ma popolega i le mafaufau. 

O nai otiotiga mai se laau plant cuttings, lauti ma sina seafood, taumafa mai le sami, ua ma’umau ai le tusa ma le 22 afe a ni tagata se toafā na malaga mai i Ausetalia.

O pasese uma ia e toafā na aofia i le mataupu lea sa tuuina iai faasalaga tupe e tai $5,500 ina ua solia le tulafono o le biosecurity border control i totonu o aso e lima i le masina na tea nei. 

O le matagaluega o faatoaga faigafaiva ma vaomatua a Ausetalia ua o latou faailoa i le lipoti lea, o laau e aumaia faapea e ono sao mai ai ni faama’i i le atunuu ma e ono tele lona aafiaga i le aufaifaatoaga i le atunuu.

Fai mai o le tagata malaga mai Sri Lanka na taumafai e nanā mai tipitipiga o laau i ana ato ina ua taunuu mai i le malaevaalele i Sini.

O le isi tagata malaga i le aso lava lea na sau ma se mago ma fatu laau, o le isi na sau mai Melepone i le aso na sosoo ai ma fasilaau na nanā mai i se pusa faapea foi ma le isi tagata na malaga mai Vietnam.

Ua faaleaogaina uma ia oloa ae ua faasala uma ai i latou ia e totogi le tai $5,500.