Ua faaopoopo pea le aofai o tagata e talosaga e tala i tua a latou KiwiSaver ona o aafiaga o le tau o le soifuaga ua iai nei aemaise le mae’a o uiga loulouā o le tau sa aafia ai vaega o le atunuu.
I le masina o Mati e 3 afe tagata na tala i tua a latou tupe mai le KiwiSaver, toeitiiti faaluaina ai le aofai na iai i le masina o Ianuari ae tele foi talosaga sa lei manuia.
Ua faailoa e le ofisa o le komesina o sulufaiga aemaise le Financial Services Complaints Ltd e mafai ona faaoo atu faaseā i o latou ofisa pe afai e lagona ua lē sa’o se faaiuga ua faia e teena ai talosaga i le mataupu lenei.
E iai foi mea e ao ona ausia ma faamalieina faatoa talia talosaga, mea e pei o le mafai ona faailoa ua le o toe mafai ona ausia manaoga i tulaga o le soifuaga i aso taitasi e aofia ai le totogiina o se mokesi pe afai e iai, o se nonogatupe ma isi tulaga faapea ma ua le mafai ona toe ausia le totogiina.
E fautuaina le sailia muamua o ni fautuaga i le mataupu a o lei talosaga.
