Fai mai e oo atu i le 40 piliona tala Amerika tusa lea ma le 57 piliona tala Ausetalia le polofiti ua maua a le kamupani penisini a le Shell mo le tausaga lava ia na tea nei 2022.
O le kamupani aupito telē lea tau suauu a Europa ma o se aofaiga aupito tele foi lea o tupe maua ua lipotia ua faaluaina ai le tupe maua sa faamauina i le 2021 e 27 piliona.
Ua faailoa o le silia ma le 40 pasene o tupe maua ia i le tausaga a le Shell e maua mai le kesi ma ua tulai mai foi i le taimi o loo faaauau ai pea le taua i Ukraine.
O le taimi nei ua faatulaga e faigamalo i le Iuni a Europ faapea ma le United Kingdom lafoga totogi i polofiti maua a kamupani fai suauu ma o le a agai sa’o ia vaegatupe e fesoasoani ai i aiga o loo feagai ma faigata ona o le siisii pea i luga o le tau o le eletise.
E le o ta’ua mai se fuafuaga a Ausetalia i lea tulaga ma se faamāmā avega mo tagata ae o le maitau foi a le toatele e foliga ai o fiafia lava le Shell i le faaauau pea o le taua i Ukraine ma atili tele ai lava a latou tupe maua ona o aafiaga o lea taua i le tau o le suauu, penisini ma le kiso o loo faapitoa iai le latou auaunaga.
