Ua teena e le Immigration a Niu Sila le visa o Candace Owens, ma e faapea ua faia a o faasā ai foi e Ausetalia.
O le Entertainers Work Visa lea na faatalosaga ai le tamaitai tusitala mai Amerika e fia ulufale mai ai i Niu Sila, peitai i lalo o tulafono o loo limata’ita’iina ai faai’uga a le Immigration e lē mafai ona talia se tagata o loo faasā mai se isi foi atunuu.
O Owens o lea na faasā e Ausetalia i le masina talu ai e mafua i le popolega e ono faatupu ai le vevesi ma feteena’i finagalo o tagata ona o mataupu o loo ia laugaina.
O Sini, Melepone, Perth, Adelaide ma Brisbane lea na faapea e faia ai tautalaga a Owens ma o lea na faamoemoe e ui mai ai foi i Aukilani i le masina nei.
O le Trusts Arena lea na faasalalau e faia ai tautalaga a Owens iinei, ma i luga o le upega tafa’ilagi a le Ticketbooth o lea ua toe tolo atu i le masina o Fepuari 2025.
Puna o Faamatalaga: Immigration New Zealand declines visa for Candace Owens
