Ua teena e le tamaitai faamasino o Talasa Atoa-Saaga le talosaga a le loia a Sam e tatala i tua Sam ma lona toalua o Sivai Kepi Mamea mai lalo o le vaavaaiga a leoleo e faatalitali ai le aso o lo la faamasinoga.
E 104 moliaga o Sam Fauena na faatulai atu e leoleo, e aofia ai moliaga o le taufaasese i leoleo, faia o faamatalaga e taufaaleaga, o le fafau o molimau, ma le taupulepule e ufiufi le mea moni.
O le toalua o Sam ia Sivai Kepi Mamea e 59 moliaga o loo molia ai e aofia ai le taumafai e ufiufi le mea moni, fafau o mau, ma lona taumafai e tetee i le faatinoga a leoleo ma le faasese o leoleo.
O mafuaaga na faaalia e le tamaitai faamasino, ua teena ai le talosaga, e aofia ai le tausaga e 2011 na poloaia ai e le faamasinoga le tusi saisai o Sam.
I lea lava tausaga e faalua ona sola ese Sam mai lalo o le vaavaaiga a leoleo, ma faatoa maua i le 2 masina mulimuli ane.
Ta’ua e le faamasinoga e lei iai se taimi na oo ane ai Sam i le ofisa o leoleo, ana lē maua lava e leoleo e lē oo ane ma e faapena foi le mataupu o loo molia ai nei, ana lē maua lava e leoleo e lē oo ane Sam ae ua leva ona sailia e leoleo i le mae’a ai ona fai o lana faatalanoaga i luga o upega tafailagi ma se tasi ofisa faasalalau mai fafo.
O le isi mafuaaga o le teena o le tatala i tua o lea ulugalii ona ua iai faamaumauga a le faamasinoga na taumafai Sam poo Fauena e faalavelave i se tasi o molimau autu a leoleo, e aofia ai se tasi o tamaitai e iai lona sootaga faaleaiga ia Sivai poo le niece o Sivai.
O le isi itu ona ua maua foi e le faamasinoga e tele ma anoanoai igoa o le alii o Sam, i faamaumauga a le ofisa o pepafanau, e lua pepafanau o Sam ma e eseese igoa o loo alu ai, o itu ia na manatu ai le faamasinoga e telē le avanoa e mafai ai e Sam ona sola ese mai le atunuu ona o le tele o ona igoa.
E lē gata i lea ae o le aafiaga o le fesootai o i laua ma nisi o loo molia faatasi i latou e pei o faamaumauga i le tamaitai o Lise Marie Schmidt o loo maua i le faamasinoga, a o nofo taofia ai na fai lava fesootaiga a i latou ia e ui o loo iai le poloaiga a le faamasinoga.
Ma o ia vaega uma na mafua ai ona teena e le faamasinoga le talosaga a lea ulugalii.
O le aso 20 o Me o le tausaga nei ua toe tolopo iai le mataupu.
