Satiu Simativa Perese
Photo: samoaobserver

Teena le talosaga a le loia o loo tulai mo Aliimalemanu

O le taeao nei lea ua amata faagasolo ai le tele o faamasinoga faatatau lava i le mataupu i le nofoa faaopoopo o tamaitai o le palemene. Na ripotia mai i Samoa o se tasi o mataupu lea na iloiloina i le taeao nei e aofia ai le talosaga a le Loia o loo tulai mo Aliimalemanu Alofa Tuuau le afioga ia Aumua Ming Leung Wai.

O lenei talosaga e faaleaogaina ai le saofai o le Faamasino Sili Satiu Simativa Perese i le laulau a faamasino e iloiloina le mataupu o le apili i le nofoa faaopoopo ona o lona piitaga i le taitai o le vaega faaupufai o le FAST ia Fiame Naomi Mataafa.

I le faaiuga a le faamasinoga maualuga na taua ai o le fesootaiga poo le piitaga o le Faamasino Sili ma Fiame e i le 4 augatupulaga (4 generations) ma e fai si mamao tele, o le mafuaaga lea na teena ai le talosaga a le afioga ia Aumua ina ia aveese mai Satiu mai le suesueina o le apili i le nofoa faaopoopo. O lona lua o faaiuga ua faaleaogaina foi le talosaga mo se faamasino mai fafo e iloiloina lea mataupu.

O lona uiga o le a faatumauina pea le auai o le afioga Satiu Simativa Perese i le iloiloina o le apili o le nofoa faaopoopo o tamaitai i le Palemene faatasi ai ma le afioga ia Tafaoimalo Leilani Tuala Warren ma le afioga ia Fepuleai Ameperosa Roma.

O le mataupu autu lava lea o le nofoa faaopoopo o tamaitai i le Palemene ua mafua ai ona faatumulia le malae i Mulinuu i le taeao nei ma o se iuga o lea mataupu o le ā iloa ai le tutusa o nofoa i le ta’i 26 pe e tumau pea le faaiuga a le faigapalota i le Aso 9 o Aperila 25 le HRPP ae 26 le FAST.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required