Ua faaauau nei ona tuli le faasalaga faafalepuipui o Afualo Faumuina Daryl Mapu, ina ua teena e le faamasinoga lana talosaga e ala i lana loia, sa finauina ai le tatala i tua i ni aiaiga ae faatali lana talosaga i le faamasinoga o apili a le faamasinoga sili, e toe iloilo ai le faaiuga na faamaonia uma ai ona moliaga e fitu e pei o le umia o ututau ma aupega malosi faapea le umia o le pauta faasāina o le ‘aisa poo le methamphetamine.

O Novema o le tausaga na tea nei na lauina ai lona faasalaga ma nofosala ai i le falepuipui mo le 18 masina poo le tausaga ma masina e ono.

O le masina lava lea na faaulu ai le talosaga a lana loia e toe iloilo ai le faamaonia o ona moliaga, ma talosaga ai foi mo le taofia o le malosiaga o le faaiuga ae tatala i tua sei faatali lana apili.

Peitai i le suesueina o ia talosaga ua faailoa ai e le afioga i le tamaitai faamasino Niava Mata Keli Tuatagaloa, e teena ma lē talia le finauga a le itu talosaga ona, o le faamasinoga sa suesueina moliaga ma faia le faaiuga sa tatau ona seei i le iloiloina o ia talosaga, auā o taiala ia tau faamasinoga o loo aiaia faaletulafono.

O Aperila o le tausaga nei o loo faatulaga e tauaofia ai le faamasinoga o talosaga a le faamasinoga maualuga, lea o le a suesue ai ma le apili a Afualo Faumuina Daryl Mapu.

Faaalia e le faamasinoga i lana faaiuga mo le tausisia o le amiotonu ma le faimea tonu e tatau ona faaauau ona tuli le faasalaga e faatali ai le apili.