E 4 moliaga faaiu a le itu a leoleo o loo molia ai se tamaitiiti 15 tausaga le matua lea na ia tatui (se’i tulou) le avetaavale laupasese i le amataga o le tausaga.
O ia moliaga e aofia ai le taumafai e faaoo le maliu i le isi tagata, o le faaoomanu’a tugā, o le umia o aupega matautia ma le faaoolima.
Ma o loo teena e lea tamaitiiti moliaga uma e tauala atu i lana loia i le amataga o le vaiaso nei.
O loo tumau pea le poloaiga a le faamasinoga e tapu ai ona faasalalau le igoa, nuu ma soo se faamatalaga e faatatau i lea alii ona e laitiiti tele.
I faamatalaga o lea mataupu e faapea, na faaaogā e lea tamaitiiti se naifi e faaoolima ai i le avetaavale laupasese na alu ai i Tuanaimato.
Na sulu le tamā na aafia i le faalapotopotoga o Taaloga a le atunuu.
O le masina o Aokuso ua faatulaga e le Faamasinoga Maualuga e amata iloilo ai lea mataupu.
